यो गर्मी महिना पनि मेरो लागि
आमा जस्तै लाग्छ
अब केही महिना कठ्याङरिनु पर्दैन
मेरा यी कलिला शरिरले
अब म ढुक्कले सुत्न सक्छु।
रुखको फेद र
मन्दिरका पेटिहरुमा।
अनि देख्ने छु सपना आमाको
काखमा निदाएको।
बाबाको हात समाएर हिडेको
सपनाबाट मलाई नबिउझाइ दिनु होला
फेरि गुम्नेछन मेरा सपनाका बुबा आमा
अनि गुम्नेछन बुबाको हात र आमाको काख।
हुनेछु फेरि एक्लै उहीँ चिसो भुइमा।
बग्ने छन फेरि पिडाको सागरहरु
बिन्ती मलाई नबिउझाई दिनु होला
तपाईंलाई त बिपनामा सबैले माया गर्छन
मलाई त सपनामा सबैले माया गर्छ्न।
त्यसैले निदाउन चाहान्छु।
बिपनिको घृणा बिर्सेर सपनिको
माया पाउन चाहान्छु।
सपनामा टन्न खाएर बिपनिको
भोक मेटाउन चाहान्छु।
म बिउझिए भने
दुख दिनेछन मेरा यि पेटले
फेरि भौतारिनु पर्छ
फालेका र जुठा खाने कुराहरु खोजिमा
कास: मैले देखेको सपना बिपना र
मैले भोगेको बिपना सपना भैदियोस।
आखिर अनाथले रमाउने भनेको
सपनामा मात्रै हो।
बिपनामा त घृणा, जुठा खाने कुरा र
चिसो भुइ नै रहेछ।
त्यसैले मलाइ बिन्ती
नबिउझाइ दिनु होला
अभिराज खाती अन्जान
थाहा नगरपालिका ४ मकवानपुर हाल काठमाण्डौ
